DELHI NEW CM: રેખા ગુપ્તા દિલ્હીના 9મા મુખ્યમંત્રી અને દિલ્હીના ચોથા મહિલા મુખ્યમંત્રી બન્યા
નવી દિલ્હી, DELHI NEW CM: રેખા ગુપ્તાએ દિલ્હીના નવમા મુખ્યમંત્રી તરીકે શપથ લીધા. દિલ્હીના ઉપરાજ્યપાલ વીકે સક્સેનાએ શપથ લેવડાવ્યા. ભાજપ 27 વર્ષ પછી દિલ્હીમાં પાછી ફરી છે. આ પ્રસંગે પીએમ મોદી અને ગૃહમંત્રી અમિત શાહ સહિત અનેક મહાનુભાવો હાજર રહ્યા હતા. રેખા ગુપ્તા દિલ્હીના ચોથા મહિલા મુખ્યમંત્રી બનશે.
પ્રવેશ વર્મા સહિત 6 ધારાસભ્યોએ મંત્રી પદના શપથ લીધા
પ્રવેશ વર્મા સહિત છ લોકોએ મંત્રી તરીકે શપથ લીધા. આ યાદીમાં પંકજ સિંહ, આશિષ સૂદ, રવિન્દ્ર ઇન્દ્રરાજ, કપિલ મિશ્રા અને મનજિંદર સિંહ સિરસાના નામ સામેલ છે. આજે મોડી સાંજ સુધીમાં મંત્રાલય અને તેમનો કાર્યભાર પણ સોંપવામાં આવી શકે છે. પંકજ સિંહ બિહારનો રહેવાસી છે અને રાજપૂત ચહેરો છે. આ ઉપરાંત, રવિન્દ્ર ઇન્દ્રજ એક દલિત ચહેરો છે. ભાજપે મંત્રીમંડળમાં તમામ વર્ગોને સ્થાન આપ્યું છે.
પીએમ મોદી સહિત ઘણા મોટા નેતાઓ હાજર રહ્યા હતા
દિલ્હીના મુખ્યમંત્રીના શપથ ગ્રહણ સમારોહમાં પીએમ મોદી સહિત ઘણા મોટા નેતાઓ હાજર રહ્યા હતા. પીએમ મોદી ઉપરાંત ગૃહમંત્રી અમિત શાહ, મહારાષ્ટ્રના મુખ્યમંત્રી દેવેન્દ્ર ફડણવીસ, આંધ્રપ્રદેશના મુખ્યમંત્રી ચંદ્રબાબુ નાયડુ, જેડીયુના કેન્દ્રીય મંત્રી લલ્લન સિંહ, બિહારના નાયબ મુખ્યમંત્રી સમ્રાટ ચૌધરી પણ હાજર રહ્યા હતા. શપથ ગ્રહણ સમારોહ દરમિયાન NDA નેતાઓનો મેળાવડો જોવા મળ્યો.
શપથ લેતા પહેલા રેખા ગુપ્તાએ ગુરુવારે સવારે મીડિયાને કહ્યું, ‘આ એક મોટી જવાબદારી છે. મારામાં વિશ્વાસ દર્શાવવા બદલ હું પીએમ મોદી અને પાર્ટી હાઇકમાન્ડનો આભાર માનું છું. મેં ક્યારેય વિચાર્યું ન હતું કે હું દિલ્હીની મુખ્યમંત્રી બનીશ. હું શીશમહેલમાં નહીં રહું.
દિલ્હીના મુખ્યમંત્રીના સત્તાવાર નિવાસસ્થાનનું નામ ભાજપે શીશમહેલ રાખ્યું હતું. અરવિંદ કેજરીવાલે તેને બનાવડાવ્યું હતું. ભાજપનો આરોપ છે કે કેજરીવાલે નિયમોનું ઉલ્લંઘન કરીને તેને બનાવવામાં કરોડો રૂપિયા ખર્ચ્યા હતા. ભાજપે તેને ચૂંટણી મુદ્દો પણ બનાવ્યો હતો.
રેખા ગુપ્તાની રાજકીય કારકીર્દી
1994-95- દિલ્હીની દૌલત રામ કોલેજમાં વિદ્યાર્થી પાંખના સચિવ
1995-96- દિલ્હી યુનિવર્સિટી વિદ્યાર્થી સંઘ (DUSU)ના સચિવ તરીકે નિયુક્ત
1996-97- દિલ્હી યુનિવર્સિટી વિદ્યાર્થી સંઘ (DUSU)ના અધ્યક્ષ
2003-04- ભારતીય જનતા પાર્ટી યુવા મોરચા દિલ્હીના સચિવ
2004-06- ભાજપ યુવા મોરચાના રાષ્ટ્રીય સચિવ
2007- દિલ્હીના ઉત્તર પિતમપુરા વોર્ડના કાઉન્સિલર, ભાજપ મહિલા મોરચાના રાજ્ય મહાસચિવ
2007-09- મહિલા કલ્યાણ અને બાળ વિકાસ સમિતિ MCD અધ્યક્ષનું પદ સંભાળ્યું
2009- દિલ્હીમાં રાજ્ય મહિલા મોરચા ભાજપ મહાસચિવ
2010- ભાજપ રાષ્ટ્રીય કાર્યકારિણીના સભ્ય
2012- ઉત્તર પિતમપુરા વોર્ડમાંથી બીજી વખત કાઉન્સિલર
2015- શાલીમાર બાગ વિધાનસભા બેઠક પરથી 11,000 મતોથી હાર્યા
2020- શાલીમાર બાગ વિધાનસભા બેઠક પરથી 4,500 મતોથી હાર્યા
2022- શાલીમાર બાગ-બી વોર્ડમાંથી કાઉન્સિલર તરીકે ચૂંટાઈ
2025- શાલીમાર બાગ વિધાનસભામાંથી ચૂંટણી લડી અને જીતી