નેશનલ ન્યૂઝ ડેસ્ક, પેરિસ ઓલિમ્પિક 2024માં ભારતીય ટીમે 6 મેડલ જીત્યા હતા. જેમાં એક સિલ્વર અને 5 બ્રોન્ઝ મેડલ હતા. મેડલ જીતીને પરત ફરેલા ખેલાડીઓનું દેશમાં ભવ્ય સ્વાગત કરવામાં આવ્યું હતું. આ તમામ ખેલાડીઓને વડાપ્રધાન નરેન્દ્ર મોદીએ આજે એટલે કે સ્વતંત્રતા દિવસ પર તેમના નિવાસસ્થાને લંચ માટે આમંત્રિત કર્યા હતા અને પૂર્વ નિર્ધારિત કાર્યક્રમ મુજબ લાલ કિલ્લા પર ધ્વજ ફરકાવ્યા બાદ પીએમ તેમના નિવાસસ્થાને પહોંચ્યા હતા અને ખેલાડીઓને મળ્યા હતા.
મુલાકાતનો વીડિયો સોશિયલ મીડિયા પર વાયરલ
પીએમ મોદીએ ઓલિમ્પિકમાં ભાગ લેનાર તમામ ખેલાડીઓનું તેમના નિવાસસ્થાને સ્વાગત કર્યું હતું. સોશિયલ મીડિયા પર વાયરલ થઈ રહેલા વીડિયોમાં પીએમ મોદી ખેલાડીઓને મળતા જોવા મળી રહ્યા છે. ખેલાડીઓ પણ આ ખૂબ જ મહત્વપૂર્ણ પ્રસંગને યાદગાર બનાવવા માટે કોઈ કસર છોડી રહ્યા નથી. પીએમ સાથે મુલાકાત કરતી વખતે ભારતીય હોકી ટીમના કેપ્ટન હરમનપ્રીત સિંહે તેમને હોકી સ્ટીક આપી અને ગોલકીપર પીઆર શ્રીજશે તેમની જર્સી આપી. મનુ ભાકરે મોદીને પિસ્તોલ આપી હતી અને અમન સેહરાવતે પણ જર્સી આપી હતી. આ સિવાય ખેલાડીઓએ પીએમને ઘણી ભેટ પણ આપી હતી. આ અવસર પર પીએમએ ખેલાડીઓને સંબોધન કર્યું અને તેમના પ્રદર્શન માટે અભિનંદન આપ્યા.
આ ખેલાડીઓએ દેશ માટે મેડલ જીત્યા હતા
#WATCH | PM Narendra Modi meets the Indian contingent that participated in #ParisOlympics2024, at his residence. pic.twitter.com/XEIs5tHrrI
— ANI (@ANI) August 15, 2024
ઓલિમ્પિક 2024માં ભારતમાંથી કુલ 117 ખેલાડીઓ ગયા હતા. તમામ ખેલાડીઓને પીએમના નિવાસ સ્થાને બોલાવવામાં આવ્યા હતા. જો કે, નીરજ ચોપરા પેરિસથી ભારત પરત ફર્યા નથી, તેથી તેઓ આ બેઠકમાં હાજર રહ્યા ન હતા. ભારત માટે મેડલ જીતનાર ખેલાડીઓમાં મનુ ભાકર, સરબજીત સિંહ, કુશલ સ્વપ્નિલ, નીરજ ચોપરા, ભારતીય હોકી ટીમ અને અમન સેહરાવતે મેડલ જીત્યા હતા. નીરજ ચોપરાએ સિલ્વર જીત્યો હતો. તે સિવાય તમામ મેડલ બ્રોન્ઝ હતા. મનુ ભાકરે 2 મેડલ જીત્યા હતા.