વર્લ્ડ ન્યૂઝ ડેસ્ક, અમેરિકાના મિસિસિપીમાં 32 વર્ષીય ભારતીય યુવક અરુકોન્ડા રાજેશનું મોત નીપજ્યું છે. તે તેલંગાણાનાં આત્મકુર ગામનો રહેવાસી હતો. 15 ઓગસ્ટ 2024ના દિવસે રાજેશના મિત્રએ તેની માતાને ફોન કરીને જણાવ્યું કે રહસ્યમયી સંજોગોમાં તેમના દીકરાનું મોત નીપજ્યું છે. આ સાંભળીને રાજેશની માતાનાં પગ નીચેથી જમીન ખસકી ગઈ હતી. તેમને વિશ્વાસ જ નહોતો થઈ રહ્યો કે એમનો દીકરો હવે આ દુનિયામાં નથી રહ્યો. અમેરિકામાં રહેતા સંબંધીઓએ જણાવ્યું કે રાજેશ બે દિવસ અગાઉ અચાનક બેભાન થઈ ગયો હતો અને બાદમાં તેને હોસ્પિટલમાં ખસેડવામાં આવ્યો હતો. અહીં ડોકટરે જણાવ્યું કે રાજેશ કોમામાં પહોંચી ગયો છે અને તેની તબિયત સતત ખરાબ થઈ રહી છે.
રાજેશના માતાએ વધુમાં કહ્યું કે મને જ્યારે ખબર પડી કે મારા દીકરાનું મોત નીપજ્યું છે તો મને તમ્મર આવી ગયા અને આંખો સામે અંધારપટ્ટ છવાઈ ગયો હતો. બે ઘડી તો શ્વાસ લેવામાં પણ તકલીફ પડવા લાગી હતી અને શું બોલું શું ન બોલું એવું થઈ ગયું હતું. મને અંદર અંદર એવું જ થઈ રહ્યું હતું કે હું પણ હમણા મૃત્યુ પામીશ. એક બાજુ દીકરાની જૂની યાદો મારા મનમાં આવવા લાગી અને બીજી બાજુ એ હવે આ દુનિયામાં નથી એ વાતના પડઘા પડવા લાગ્યા હતા. મારો દીકરો અમેરિકામાં ઘણી મહેનત કરતો હતો અને અહીં મને પણ રૂપિયા ટ્રાન્સફર કરતો રહેતો હતો. રાજેશના મોતના સમાચાર તેલંગાણામાં રહેતા તેની માતાને શિવા નામનાં એક શખસે આપ્યા હતા. શિવા પણ અમેરિકામાં રહેતો હતો અને રાજેશનો ક્લોઝ ફ્રેન્ડ હતો. તેવામાં અમેરિકા રહેતા સંબંધીઓએ કહ્યું કે રાજેશના લગ્ન નહોતા થયા અને તેને ડાયાબિટિસ હતો. પરંતુ છેલ્લા ઘણા સમયથી તે ફિટ હતો અને પોતાનું રૂટિન કામ પણ સારી રીતે કરતો હતો. જેથી અમને પણ નથી સમજાઈ રહ્યું કે રાજેશનું મોત કેવી રીતે થયું છે. જ્યારે તેના પરિવારેને અમે આની જાણ કરી તો તેઓ પણ એ સ્વીકારવા તૈયાર જ નહોતા કે આ કેવી રીતે થઈ ગયું છે. બીજી બાજુ મિસિસિપી સ્ટેટ પોલીસે પણ રાજેશના મોતનું કારણ નથી જણાવ્યું કે પછી વધુ વિગતો પણ બહાર નથી પાડી.
રાજેશે હનમકોંડાથી એમફાર્મ પૂરૂ કર્યા પછી વર્ષ 2015માં હાયર સ્ટડિઝ માટે અમેરિકા ગયા હતો. અહીં અભ્યાસ કર્યા પછી તેને નોકરી મળી ગઈ અને તે ત્યાં જ રહી ગયો હતો. જોકે કોવિડ મહામારી સમયે તેની નોકરી જતી રહી હતી અને ત્યાં પણ એને ઘણી મુશ્કેલીઓનો સામનો કરવો પડ્યો હતો. તેવામાં ગત વર્ષે એના પિતાનું અવસાન થયું એટલે રાજેશ ભારત આવ્યો હતો અને પછી થોડા સમય પછી અહીં રોકાયા બાદ પાછો અમેરિકા જતો રહ્યો હતો. અહીં અમેરિકામાં પણ રાજેશની લાઈફમાં ઘણી સ્ટ્રગલ હતી. તે પાર્ટ ટાઈમ નોકરી કરી રહ્યો હતો અને પોતાનુ ગુજરાન ચલાવી રહ્યો હતો. તેવામાં પરિવારે અમેરિકામાં રહેતી રાજેશની એક મિત્રનો સંપર્ક સાધ્યો હતો. આ યુવતી પણ મૂળ તેલંગાણાની હતી અને રાજેશ સાથે ઘણી ક્લોઝ પણ હતી. જોકે રાજેશનું મોત કેવી રીતે નીપજ્યું એની આ યુવતીને પણ જાણ નહોતી. પરિવારે કહ્યું કે યુવતી છેલ્લા ઘણા સમયથી રાજેશ સાથે કોન્ટેક્ટમાં નહોતી. રાજેશનો મૃતદેહ ડિન મેમોરિયલ ફ્યુનરલ હોમમાં છે. રાજેશની માતાએ એના અંતિમ સંસ્કાર માટે તેલંગાણા સરકારની મદદ માગી હતી. જેથી કરીને તેલંગાણા સરકારે વોશિંગ્ટનમાં ઈન્ડિયન એમ્બસીનો સંપર્ક સાધ્યો અને લોકલ ઓથોરિટી તથા હોસ્પિટલ ઓથોરિટીને રાજેશના મોત બાદ મૃતદેહને ભારત મોકલવા માટે વિનંતી કરી હતી.